Radio Estrela. Os programas ben ordenadiños.

Ola, troitiñ@s.

Dende que empezou a funcionar a nosa Radio Estrela xa producimos unha morea de programas.

Para telos todos ordenadiños por temas e datas, inaguramos a nosa 

WEB DE CONTIDOS DE RADIO ESTRELA

Como podemos acceder a ela?

Pois moi doado, clica no logo que está aloxado aí na dereita da pantalla.

Aquí vedes o logo de Radio Estrela. Clicade nel para entrar na web.

Tamén podedes clicar no logo de Ivoox se preferides acceder aos contidos  a través desta aplicación. 

Así veredes os programas en Ivoox.

E así de chula aparece a portada da nova web.

Navegando a través dos botóns e do panel superior podedes atopar todos os programas clasificados.

Buscade os vosos favoritos.

E so tendes que premer no reprodutor para gozalos

A que agardades para entrar?!

Bicos redeiros

ESTRELA

Cita a cegas 2019: Namórate dun libro!!

Ola, piardiñas.

Hoxe, 14 de febreiro, é o día de san Valentín. O día das namorad@s, disque.

E como o imos celebrar na biblio?

Pois tendo unha cita cos nosos máis grandes amores! Os libros!

Propóñovos o seguinte:

Imos organizar unha cita a cegas. 

Un encontro inesperado cun libro que nos namorará.

Como nos organizamos?

1. NA ENTRADA DA BIBLIOTECA ESTANVOS ESPERANDO DUCIAS DE LIBROS ENVOLTOS PARA MANTER A SÚA IDENTIDADE EN SEGREDO.

2.  AS CORES DO ENVOLTORIO CORRESPÓNDENSE COA IDADE D@S LECTOR@S.

VERMELLO: primeir@s lector@s.  

  

VERDE: lector@s autónom@s 

AMARELO: grandes lector@s

3.  ESCOLLEREDES O VOSO LIBRO SEGUINDO OS PÁLPITOS DO CORAZÓN, A DIRECCIÓN DO VENTO, A POSICIÓN DO SOL NO FIRMAMENTO… OU SEGÚN SE É MÁIS GROSO OU MÁIS FINO…. QUE NOS COÑECEMOS!

4. FACEMOS O PRÉSTAMO NO ORDENADOR DE XESTIÓN.

5. E XA PODEMOS LEVALO!

6. DAMOS O MELLOR DE NÓS NESTA CITA, LENDO O LIBRO CO MAIOR INTERESE E CARIÑO (MALO SERÁ QUE NON NOS GUSTE. E SE ASÍ PASA, SEGURO QUE TEMOS MÁIS SORTE NA VINDEIRA CITA).

7. É IMPORTANTE QUE CONSERVEMOS O ENVOLTORIO DURANTE O PRÉSTAMO E QUE  DEVOLVAMOS O LIBRO ENVOLTO. ASÍ SEGUIMOS MANTENDO O MISTERIO E CONTRIBUIMOS A NON ESTRAGAR OS NOSOS RECURSOS.

8.   LUGAR DE ENCONTRO: A BIBLIOTECA.

9. DÍA E HORA: RECREOS E TARDES (AGÁS MARTES) A PARTIR DE HOXE.

ACUDIDE Á CITA!!! 

(NON ME IREDES DEIXAR PLANTADA…)

BICOS CEGATOS

ESTRELA

Día Mundial da Radio: as novas que queremos.

Ola, coruxiñ@s.

Para celebrar o Día Mundial na Radio participamos, invitad@s por REDE ESPORA, na actividade "As novas que queremos".

Porque queremos un mundo con paz, diálogo e solidaridade e querémolo xa!

O alumnado de sexto preparou unha das novas deste noticieiro no que participaron varios centros escolares de toda Galicia.

Aquí tendes o resultado.

Bicos solidarios.

ESTRELA

Día Mundial da Radio: escoita Radio Estrela!

Ola, congriñ@s:

Co lema de "Diálogo, tolerancia e paz", hoxe celébrase o Día Mundial da Radio.

E que mellor maneira de celebralo que escoitar Radio Estrela?

Pinchade na imaxe e accedede aos contidos da nosa emisora.

Gózadeos!

Bicos nas ondas.

ESTRELA

Ata sempre, Tomi Ungerer!

https://elpais.com/cultura/2019/02/09/actualidad/1549713324_299147.html

Deixonos moi tristes, pero os seus bandidos quedan con nós para sempre.

Bicos bandoleiros

ESTRELA

Queres un? Colleo!

Ola bacallauciñ@s!

Na biblio tentamos ter un catálogo de obras amplo, actualizado, que se axuste ás nosas necesidades.

Ou sexa que a cada pouco asoman pola porta caixiñas cheas de tesouros. Libros que arrecenden a novo e que na meirande parte das veces xa nin chegan ao expositor de novidades.

Apenas se rexistran xa saen voando nas vosas mans.

Pero a biblio ten un espazo limitado e tamén a cada pouco imos retirando dos andeis libros que deixan o seu espazo ás novas incorporacións.

Son libros fermosos, importantes, sabios... e nunca van deixar de selo.

Entón por que os retiramos?

Pois porque temos moitos exemplares repetidos, porque temos novas edicións, porque xa están un pouco gastados e vivirán mellor no caloriño e  tranquilidade da vosa biblioteca persoal...

Na entrada da biblio atoparedes unha mesa cos libros expostos. Hainos de todas as temáticas e para todas as idades, incluso para adultos.

Invítovos  a que collades dous para vós e dous para agasallar na vosa casa.

As familias tamén podedes vir en horario de tarde.

Parádevos un pouquichiño a elixilos con cariño.

E gozádeos.

Bicos de agasallo

ESTRELA

A biblio de Estrela, plató de cine.

Como o ledes, minchiñas.

Á morea de cousas que temos feito, visto e oído na nosa biblio agora xa podemos sumarlle a gravación de curtas de cine.

Onte, ás mestras de Vilariño tocoulles ser anfitrionas no curso "Creación dunha radio e televisión escolar II" promovido polo Concello de Cambados e no que tamén participan compañeiras/os dos coles de Castrelo e Tremoedo, do IES Asorey e do Epapu Nelson Mandela do Centro Penitenciario A Lama.

O profe da actividade, Xoán Leira, apareceu cunha morea de trangallada interesantísima: cámaras, focos, trípodes... e nun plis plás esto xa parecía un estudo de cine dos de verdade.

Distintos momentos da rodaxe da primeira curta. O mestre Leira compartindo o seu saber.

Pero non todo foi cámara e acción.

Antes os equipos tiveron que pensar a trama, as personaxes, as secuencias, os planos... mimadriña, esto do cine dá un choio tremendo!

Na xornada deseñáronse de catro curtas e a graváronse dúas. 

O resto das filmacións terán que agardar ao próximo encontro, aló por terras de Castrelo.

Catro fotogramas da segunda curta

Os equipos que xa gravaron están en fase de montaxe... que sairá de aí?

Seguide atentas/os.....

Bicos cinematográficos.

ESTRELA

Boletín exprés: 3º e 4º estrean a súa horta

Hortiña que quero tanto, repoliños que plantei....

Boletín expres: entrevista a Salomé e Severo

Pinchade na imaxe para non perder detalle!

Boletín exprés da biblio: visita de Severo e Salomé

Novo boletín exprés da biblio!!

Queres lelo? Pincha na imaxe.